„Мамо, помогни ми, ме нападна мечка“: Хорор во Словенија

Паниката во Словенија сè уште не се смирува, каде што пред неколку дена мечка нападна жена (59) и ѝ нанесе повреди опасни по живот.

Нападот се случил во вторник наутро, во градот Градишче, во општина Шкофљица. Г-ѓа Људмила, мајката на повредената жена, рекла дека нејзината ќерка излегла да го прошета своето куче како и обично, а потоа се случил ужас.

Људмила за 24ur изјавила дека нејзината ќерка ја напуштила куќата околу 7 часот наутро, водејќи го кучето, како и секогаш, на поводник. Во еден момент се загрижила бидејќи нејзината ќерка останала надвор подолго од вообичаеното.

„Одеднаш, го слушнав кучето како лае под прозорецот. Тој сè уште беше на поводник, но беше сам“, вели Људмила.

Потоа ја видела својата ќерка како лази пред куќата, облеана во крв.

„Таа рече: „Мамо, помогни ми, ме нападна мечка“. Успеала само да ми каже дека ја соборил на земја и ја „искинал на парчиња“, вели вознемирената Људмила.

Општина Шкофљица, исто така, се огласи за инцидентот. Според нив, нападот се случил во област која е дел од основното живеалиште на кафеавата мечка - ова значи дека мечката е постојано присутна на таа територија, се размножува и се храни. Мештаните се информирани за природата на живеалиштето преку јавни соопштенија и активности за подигање на свеста организирани од Ловечкото друштво Шкофљица.

„Сакаме да истакнеме дека можноста на општината директно да реагира е ограничена, бидејќи кафеавата мечка е во сопственост на државата. Државата одредува ловни квоти за регулирање на популацијата“, соопшти општината, додавајќи дека, на иницијатива на градоначалникот, пред две години побарале помош од Ловечкото друштво Шкофљица, кое оттогаш редовно го посетува подрачјето - и во шумата и во урбаните средини на општината.