Силно невреме го погоди Њујорк и Њу Џерси – метрото поплавено, илјадници летови откажани

Силно невреме проследено со обилни врнежи од дожд го зафати североистокот на САД, предизвикувајќи хаос во сообраќајот и сериозни поплави во Њујорк и Њу Џерси.

Само за еден час во централниот дел на Њујорк паднаа околу 5 сантиметри дожд – најинтензивен пороен дожд од 1943 година наваму. Во некои делови на Њу Џерси, пак, количеството врнежи надмина 15 сантиметри, што доведе до прогласување вонредна состојба од страна на гувернерот Фил Марфи.

Поплавите парализираа делови од јавниот превоз – неколку метро станици беа преплавени, возовите се движат со доцнење, а на некои линии сообраќајот целосно е прекинат. Социјалните мрежи се преплавени со снимки на патници кои стојат на седишта за да избегнат вода што навлегла во вагоните.

Покрај тоа, воздушниот сообраќај исто така доживеа огромни нарушувања. Повеќе од 1.600 летови се откажани на аеродромите JFK, LaGuardia и Newark. Патниците се соочуваат со долги доцнења и пренасочувања.

Автопатиштата во регионот, вклучувајќи ги Taconic State Parkway, Bronx River Parkway и FDR Drive, се затворени поради поплави и паднати дрвја. Спасувачки екипи интервенираа на десетици локации за да извлечат заглавени возила и да спасат луѓе од поплавени домови.

Метеоролозите предупредуваат дека опасноста од нови врнежи сè уште не е помината и ги повикуваат граѓаните да останат внимателни. Националната метеоролошка служба издаде предупредувања за ненадејни поплави за неколку држави во североисточниот регион на САД.

Оваа временска непогода се смета за една од најекстремните во последните години и уште еднаш ја отвора дебатата за влијанието на климатските промени врз екстремните временски услови.