Американски тинејџер се самоуби по добиен совет од ChatGPT

Неколку дена откако нивниот 16-годишен син Адам си го одзел животот, Мет и Марија Рејн очајно го пребарувале неговиот мобилен телефон во потрага по причина за трагедијата. Наместо пораки на Snapchat или сомнителни пребарувања на интернет, тие нашле нешто неочекувано: транскрипти од разговори со Чет ГПТ, пренесе NBC News.

– Мислевме дека ќе најдеме преписки на Snapchat или некои чудни интернет групи, култови, не знам…“, раскажува Мет Рејн.

Според родителите, Адам последните недели често го користел четботот како замена за друштво, доверувајќи му се за своите стравови и анксиозности. Разговорите, велат тие, покажуваат постепена промена – од помош околу домашни задачи до нешто што тие го нарекуваат „тренер за самоубиство“.

– Тој ќе беше жив ако не постоеше Чет ГПТ. Сигурен сум во тоа 100% – изјавил таткото.

Во тужба поднесена во вторник во Вишиот суд на Калифорнија во Сан Франциско, семејството го обвинува OpenAI и нејзиниот извршен директор Сем Алтман за немарност. Тие тврдат дека четботот му помогнал на Адам да истражува методи за самоубиство и дека, иако младиот човек изразил јасни намери дека „ќе го направи тоа еден ден“, системот не ја прекинал интеракцијата ниту пак активирал протокол за итни случаи.