Гаши на проштална средба со амбасадорката на Швајцарија, Вероник Улман

Претседателот на Собранието Африм Гаши денеска оствари проштална средба со амбасадорката на Швајцарија, Вероник Улман. 

Собраниската прес-служба информира дека Гаши изразил благодарност за нејзиниот ангажман во зајакнувањето на пријателските односи и парламентарната соработка меѓу двете земји, како и за континуираната поддршка што Швајцарија ја дава на европската интеграција на нашата држава. Посебно бил истакнат придонесот во основањето и развојот на Парламентарниот институт, кој претставува трајно наследство од нејзиниот мандат.

- Амбасадорката Улман ја оцени својата мисија во Северна Македонија како исклучително плодна и успешна, со бројни ангажмани кои резултираа со позитивни промени, особено во работата на Собранието и во јакнењето на неговите институционални капацитети. Таа изрази надеж и уверување дека и во иднина Собранието ќе продолжи да работи со истата посветеност, капацитет и консензус. Претседателот Гаши ѝ посака натамошен успех во кариерата, нагласувајќи дека нејзиниот личен ангажман и посветеност оставија позитивен и траен впечаток во односите меѓу двете земји, се вели во соопштението.