Косово се усогласи со американската листа на странски терористички организации

Косовската претседателка Вјоса Османи издаде уредба со која Приштина се усогласува со списокот на странски терористички организации на Соединетите Американски Држави, пренесува Данас.

Меѓу организациите додадени на листата се картели, како и јеменската Ансар Алах, односно бунтовниците Хути.

Османи рече дека Косово стои зад Соединетите Американски Држави во борбата против транснационалниот организиран криминал и тероризам, нарко-картелите и криминалните режими.

„Историјата ја покажува едноставната вистина дека кога Америка е предводник, има повеќе мир, повеќе безбедност и повеќе слобода низ целиот свет. Косово секогаш ќе застане со САД во унапредувањето на оваа визија и во настојувањето да се бори против сите оние кои ја загрозуваат националната безбедност на нашиот најважен сојузник“, напиша Османи на социјалната мрежа X.

На 20 јануари, американскиот претседател Доналд Трамп издаде извршна наредба со која картелите Голфо, Халиско Нуева Генерацијан, Синалоа, Норесте, Унидос, Нуева Фамилија Мичоакана, Мара Салватруча (MS-13) и Трен де Арагва се означени како странски терористички организации.

Во меѓувреме, со наредба од 22 јануари, САД ги преименуваа Ансар Алах, или бунтовниците Хути во Јемен, во терористичка организација.