Онкологија: Обвинителството бара притвор за екс-директорот Нухи - Има опасност од бегство
Во Апелациониот суд во Скопје денеска се одржа јавна седница по жалбите на мерката „куќен притвор“ за поранешниот организациски директор на Клиниката за онкологија Нехат Нухи за случајот „Онкологија“. Обвинителството бара укинување на куќниот и определување ефективен притвор, поради опасност од бегство, додека Нухи вели дека е невин и побара од судот да се брани од слобода.
Судијката Весна Димишкова, образложувајќи го предметот рече дека првостепениот суд при одредување на мерката притвор од 30 дена ценел дека во моментот на одлучување присуството на осомничениот може да се обезбеди со мерка куќен притвор.
Јавната обвинителка Фатиме Фетаи, објаснувајќи го предлогот за ефективен притвор рече дека притвор не се определува само ако постои бегство надвор од Македонија, туку и ако постои опасност од криење на осомничениот на територија на државата.
-Имајќи го предвид видот, карактерот и последиците од кривичните дела кои му се ставаат на товар и дека е оштетен буџетот во висина од 2.2 милијарди денари постои оснивано сомневање дека може да се даде во бегство. Сметаме дека постои основ за определување на мерка притвор, изјави Фетаи.
Обвинетиот Нехат Нухи пред судот рече дека е татко на три малолетни деца, со мајка што има навистина сериозно нарушување на здравјето и дела активно работи како адвокат и има предмети.
-И хипотетички, јас никогаш не би се дал во бегство, затоа што верувам дека сум невин и ќе се борам до крај правдата да биде задоволена и за мене да има ослободителна пресуда, изјави Нухи.
Неговата адвокатка Анита Бегова, во однос на зголемениот ризик за определување мерка притвор, рече дека против Нухи имаме обвинителен акт, кој може да биде и одбиен и дека целта за барање ефективен притвор е само да не може да подготви квалитетна одбрана.
-Претходно имаме искуство со мерки кои Нухи доследно година и пет месеци целосно ги испочитува. Не постои основ дека делото ќе го повтори, затоа што не е повеќе директор. Има три деца, и се грижи за својата мајка. Не е имотен за да си прушти бегство и криење во странство, изјави Бегова.
За предметот „Онкологија“, Основното јавно обвинителство поднесе две обвиненија со кои се опфатени двајцата поранешни директори на Клиниката и четворица доктори онколози. Нехат Нухи, како поранешен организациски директор на Клиниката за онкологија е обвинет за „злоупотреба на службената положба и овластување“, „измама во службата“ и „проневера во службата“.
Повеќето од дејствијата, како што информира тогаш на прес-конференција предметната обвинителка Ана Гоговска Јакимовска, првообвинетиот Нино Васев во својство на службено лице директор и второобвинетиот Нехат Нухи, како организациски директор, ги извршиле во соизвршителство во временски период од 2018 до 2022 година.
-Кривичното дело „Злоупотреба на службената положба“ го извршиле со пречекорување на границите на своето службено областување и не ја извршиле својата службена должност во постапките за набавка на лекови, постапувајќи спротивно на Законот за здравствена заштита, Законот за здравствено осигурување, статутот на Клиниката, Законот за буџетите и Законот за јавни набавки, рече Гоговска Јакимовска.
Двајцата се обвинети за продолжено кривично дело „Измама во службата“, така што во вршење на својата службена должност со намера за друг да прибават противправна имотна корист, создале противправна обврска и го довеле во заблуда Фондот за здравствено осигурување (ФЗО) да изврши незаконита исплата. На тој начин, Гоговска Јакимовска рече задобувачите на лекови прибавиле значителна корист во износ од над 430 милиони денари.
Со ваквите дејствија, обвинителката посочи дека тие прибавиле значителна имотна корист за друг и нанеле штета на државниот Буџет во вкупен износ од над 2,2 милијарди денари.
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа
