Османи: На 19 октомври народот на Чаир ќе го порази системот за купување на волјата на граѓаните
Кандидатот за градоначалник на Чаир, Бујар Османи, во своето обраќање до јавноста истакна дека во општината се крева ново движење, движење на отпорот и достоинството, кое, како што рече, е поголемо од било која изборна кампања.
„Сакам јасно да кажам: на 19 октомври народот на Чаир ќе излезе масовно и ќе го порази системот за купување на волјата на граѓаните, никој не може да го обезвредни нивниот глас ако луѓето масовно излезат и ја изразат својата волја. Никој! Ова не се обични избори. Ова е отпор и започнува движење за нов Чаир,“ изјави Османи.
„Сметам дека она што се случува во Чаир е поголемо од изборна кампања. Изборите во Чаир се историски. Се буди енергија на отпор. Отпор кон начинот на управување. Кон корупцијата. Кон уцените. Кон клиентелизмот. Она што го гледам овие денови е мотивација за мене. Ни се придружуваат луѓе кои не се од ниту една партија: наставници, активисти, занаетчии… кои сами доаѓаат и велат: ова е историска шанса да го ослободиме Чаир,“ изјави Османи.
Тој потенцираше дека во Чаир веќе се формира движење што има за цел да врати достоинство и ред, со јасна порака дека „Чаир не е приватна сопственост на никого, ниту пак рудник за дијаманти“.
„Се буди движење за достоинство. Движење на отпорот за нов, чист Чаир, со модерни училишта и безбедни улици. Движење што ќе докаже дека Чаир не е приватна сопственост на никого. Мојата улога е само да бидам глас на таа енергија, институционално да ја канализирам. Победата не е моја, победата е на сите граѓани на Чаир, кои ќе се кренат и ќе кажат: доста е,“ порача Османи.
29.08.2025 - 15:26
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа
