Калас предупредува дека притисокот врз Украина да предаде делови од територијата на Русија е стапица на Путин

Високата претставничка на ЕУ за надворешни работи и безбедносна политика, Каја Калас, ги предупреди западните лидери дека притисокот врз Украина да предаде делови од територијата на Русија е стапица во која Путин ги влече.

Калас во интервју за Би-Би-Си изјави дека дозволувањето на Русија да ги задржи украинските територии како дел од мировниот план е стапица во која рускиот претседател Владимир Путин сака да паднат.

Тоа беше нејзино прво интервју за британски медиум откако европските лидери се придружија на мировните разговори на американскиот претседател Доналд Трамп со украинскиот претседател Володимир Зеленски во Белата куќа минатата недела.

Украина постојано ја отфрла можноста за предавање на Донбас на Кремљ во замена за мир, иако американскиот претседател Доналд Трамп ја нагласи потребата од „размена на територии“.

Калас, исто така, зборуваше долго за „кредибилни и силни“ безбедносни гаранции за Украина, објави Би-Би-Си.

Таа призна дека нема многу конкретни чекори за одвраќачка сила во оваа фаза од преговорите.

-Најсилната безбедносна гаранција е силна украинска војска, рече таа, нагласувајќи ја важноста од воспоставување гаранции кои не се само на хартија.

Таа рече дека од земјите-членки на „коалицијата на подготвените“ зависи точно како би можеле да придонесат и дека сè уште не е јасно под кој мандат би дејствувале нивните сили.

Лидерите на клучните земји од ЕУ, вклучувајќи ги Франција, Германија, Италија и Финска, му се придружија на украинскиот претседател Володимир Зеленски на разговори во Белата куќа минатата недела, неколку дена откако претседателот Трамп го угости рускиот претседател Владимир Путин во воена база во Алјаска.