„Сакал да биде амбасадор“: Откриено кој се обидел да провали во канцеларијата на Зоран Милановиќ: Тврдел дека има бомба

Пред комплексот на канцеларии на хрватскиот претседател Зоран Милановиќ во загрепската населба Пантовчак, утрово се случил инцидент кога маж (67) се обидел да влезе во заштитеното подрачје без дозвола, заканувајќи се дека возилото со кое пристигнал има бомба.

Лицето кое се обидело да влезе во комплексот на претседателските канцеларии е поранешен припадник на хрватската армија, сега пензиониран, неофицијално дознава N1.

Според извештаите, тој побарал претседателот Зоран Милановиќ да се сретне со него на разговор, бидејќи сакал да го назначи за амбасадор во Словенија.

Извршен е претрес на автомобил

Според најновите информации, против него ќе бидат поднесени кривични пријави.

Патем, иако човекот тврдел дека има бомба, полицијата не пронашла ништо при претресот на неговиот автомобил.

Според информациите на „Јутарњи лист“, човекот го возел својот автомобил до рампата пред канцеларијата на хрватскиот претседател, по што се обидел да продолжи и покрај предупредувањата на обезбедувањето. Кога бил запрен, тој почнал да зборува неповрзано, наведувајќи дека има бомба во возилото со кое влегол.

Обезбедувањето веднаш ја повикало полицијата, која, по пристигнувањето на местото на настанот, го привела човекот. По темелно претресување на неговиот автомобил, се покажало дека станува збор за лажна закана, бидејќи во автомобилот немало експлозиви или оружје.