Полицијата упадна во позната фабрика за автомобили, уапсени речиси 500 луѓе

Стотици федерални агенти упаднаа во мал град во југоисточна Џорџија и извршија рација во фабриката „Хјундаи Мета“ - апсејќи 475 лица во најголемата рација досега во тековната имиграциска акција на администрацијата на Доналд Трамп врз работните места во САД.

Федералните власти претходно проценија дека 450 лица биле уапсени во четврток на огромно градилиште во Елабела, околу 25 милји западно од Савана, Џорџија.

Повеќето се корејски државјани, рече Стивен Шранк, специјален агент задолжен за истрагите за внатрешна безбедност (HSI). Шранк додаде дека нема прецизна распределба на националностите на уапсените, објави CNN.

Сите 475 уапсени лица биле нелегално во САД, рече Шранк. Некои ја преминале границата нелегално, некои имале визи кои не биле овластени за работа, а некои останале подолго од важењето на нивните визи, рече тој.

За време на рацијата, неколку лица се обиделе да избегаат - вклучувајќи и некои кои избегале во септичка јама на имотот, соопшти Канцеларијата на американскиот обвинител за Јужниот округ на Џорџија.

„Агентите користеле чамец за да ги извлечат од водата. Едно од лицата пливало под чамецот и се обидело да го преврти, но не успеало. Лицата биле уапсени и идентификувани како нелегални работници“, соопшти канцеларијата на обвинителот.

Шранк истакна дека некои од работниците можеби биле изведувачи или подизведувачи. Портпарол на Хјундаи за Си-Ен-Ен изјави дека не верува оти некој од уапсените бил директно вработен во Хјундаи Мотор Компани.

„Свесни сме за неодамнешниот инцидент на градилиштето на ХЛ-ГА Батери Компани во округот Брајан, Џорџија. Внимателно ја следиме ситуацијата и работиме на разбирање на специфичните околности“, изјави портпаролот Мајкл Стјуарт во петокот.

„Според нашите сознанија, ниту еден од приведените не е директно вработен во Хјундаи Мотор Компани. Безбедноста и благосостојбата на сите што работат на локацијата е наш врвен приоритет и ние ги почитуваме сите закони и прописи каде и да работиме“, додаде тој.

Огромниот „Хјундаи Метафабрика“ се протега на 2.900 хектари и има два дела: фабрика за производство на електрични возила и фабрика за батерии за возила, што е заедничко вложување помеѓу Хјундаи и LG.